Hvorki Guðmundur Már né Ólafur Einarsson hafa notað PIP brjóstafyllingar

Í tilefni af umræðu um PIP sílikon brjóstafyllingar frá Frakklandi viljum við Guðmundur Már Stefánsson og Ólafur Einarsson koma eftirfarandi upplýsingum á framfæri. Hvorugur okkar hefur notað umræddar PIP sílikon brjóstafyllingar. Eingöngu hafa verið notaðar brjóstafyllingar sem uppfylla gæðastaðla á læknastofum okkar.

Starfsleyfi Ólafs Einarssonar framlengist til haustsins 2012

Starfsleyfi Ólafs Einarssonar hefur verið framlengt um óákveðin tíma en þó ekki skemur en fram til haustsins 2012. Ólafur starfar um þessar mundir í Danmörku.

Næstu skref

Ef þú kemst að þeirri niðurstöðu að aðgerð muni hjálpa þér er næsta skref að panta tíma hjá lýtalækni. Áður en að viðtali kemur skaltu á yfirvegaðan hátt skilgreina vandlega eðli lýtisins og rökin fyrir því hvernig aðgerð muni bæta stöðu þína. Stundum er þetta skref einfalt og augljóst en á stundum getur það verið mjög persónulegt og öðrum að mestu hulið. Afar mikilvægt er að forsendurnar og rökstuðningurinn liggi fyrir þegar að viðtali kemur.

Velkomin á heimasíðu okkar um lýtalækningar

Markmið heimasíðunnar er að upplýsa einstaklinga sem telja sig þurfa á lýtaaðgerð að halda um ávinning, framkvæmd, áhættur og fylgikvilla lýta- og fegrunaraðgerða, sem og að hjálpa einstaklingum að taka fyrstu skrefin í sjálfstæðu mati á þörf fyrir slíka aðgerð

Hlutverk heimasíðunnar

Með þessari heimasíðu vilja lýtalæknarnir Guðmundur Már Stefánsson og Ólafur Einarsson veita upplýsingar um helstu aðgerðir sem lýtalæknar framkvæma. Ef þú telur þig hafa ástæðu til þess að leita til lýtalæknis er fyrsta skrefið að skoða þann flokk aðgerða sem á við um þig út frá þínum persónulegu ástæðum. Því næst skaltu fara vel yfir spurningar og svör og leggja raunsætt mat á vandamálið út frá þeirri umfjöllun. Ef ekki er umfjöllun hér á heimasíðunni um nákvæmlega þitt vandamál skaltu skoða það sem helst gæti líkst eðli þess. Ef þú kemst að þeirri niðurstöðu að aðgerð geti komið að gagni er rétt að skoða og hugleiða vandlega alla þætti aðgerðarinnar, undirbúning, framkvæmd, áhættu, tímann sem aðgerðin tekur og einnig að átta sig á þeim tíma sem fer í að ná fullum bata. Mikilvægt er að hafa hugfast við yfirferð allra þátta hvort aðstæður þínar muni raunverulega batna.

Hvers vegna að leita til lýtalæknis?

Ástæðurnar fyrir því að einstaklingur ákveður að fara í lýta- og/eða fegrunaraðgerð geta verið margar, allt frá smávægilegum útlitsatriðum sem valda óþægindum yfir í lýti sem aflaga útlit með áberandi hætti. Ræturnar geta einnig verið margs konar, allt frá fæðingargalla yfir í afleiðingar af slysi eða sjúkdómi. Það sem er sameiginlegt er að lýtið veldur andlegri vanlíðan og hefur áhrif á sjálfstraust og sjálfsímynd. Oft og tíðum geta einstaklingar miklað fyrir sér lýti sem alls ekki er ástæða til að hafa áhyggjur af. Á hinn bóginn geta margs konar lýti, bæði stór og smá, verið þess eðlis að einstaklingurinn hefur fulla ástæðu til að leita til læknis. Þá ber lækninum að hjálpa einstaklingnum við að leggja raunhæft og faglegt mat á eðli lýtisins og þýðingu þess fyrir einstaklinginn. Í þeim tilfellum þar sem slíkt sameiginlegt mat leiðir til aðgerða hefur það oftar en ekki í för með sér bætta líðan einstaklingsins.